Maganda sana kung magkwekwento ako ng nakakatakot sa post na ito. Tipong pang Oka Tokat o kaya Gabi ng Lagim. Kaso tatakutin ko lang ang sarili ko… mananakot pa ako ng iba.
Madami tayong pinaniniwalaan na kababalaghan sa mundong ito. Hindi mo alam kung alin ang imbento lang ng Scientist mong magulang o ikinuwento lang ng magulang nila na naging exaggerated. Scientist kasi mahilig gumawa ng theories at hypothesis based sa reaction ng anak nila. Gaya ni Noli De Castro dati na naging habit na ang takutin ang mga Pilipino pag malapit na ang Araw ng mga Patay, tuwang tuwa ka naming panoorin. Hindi ba niya alam na kabastos bastos para sa mga kaluluwa na gawin silang nakakatakot? Adik ba siya? Yung unang taong ang sagot, malamang, para lang siguro sa rating. Yung pangalawa… hindi ko alam.
Sinabi kasi ng kaofficemate ko ang pangyayari sa bahay nila kelan lang. Sabi ng yaya ng anak nila na may nakikita daw siya na lalaking nakaitim sa kusina nila pag gabi. Mas pinaganda pa niya ang kwento, malapit na daw kasi ang araw ng mga patay kaya daw lumalabas na ang mga kaluluwa. Tanong naman ng kaofficemate ko “Bakit alam nila na November 1 na?”. Hindi na daw nakasagot… Siguro kung aamin si Noli de Castro na adik siya, ipagkakalat ng yaya niya na mas mabisa ang katol sa kahit anumang addictive drugs.
